"البلد دي مش بلدنا يا طه دي بلدهم هما"
بثينه السيد ....عماره يعقوبيان
من زمان باسأل نفسي سؤال ومش لاقي له اجابه ..وحتي لو لاقيتها بتبقي مؤلمه اكتر من السؤال نفسه ......هي البلد دي بتظلم ولادها قوي كده ليه ؟ ليه اللي بيحبها كارهاه و اللي بيكرها حبّاه؟ ليه اللي بيسرقها ويغرقها ويقتلها دايما فاكراه و اللي بيتغزل فيها و يبنيها ويعمر اراضيها دايما ناسياه ؟ ليه اللي بيغنيلها كانه بيغني بدمه دايما مجهول واللي بيتاجر بيها وفيها وباسمها ف كل حته هو اللي دايما شايلاه لفوق؟....ليه العمله الرديئه دايما هي اللي ع الوش و العمله الجيده دايما ممسوحه؟.....معقوله واحد زي الشيخ امام عيسي في اجيال كامله ماتسمعش عنه؟......معقوله مافيش ميدان في مصر باسم امل دنقل؟.....معقوله شعر صلاح عبد الصبور ما يتدرسش في المدارس؟......معقوله واحد زي جمال حمدان يعيش ويموت وحيد بين اربع جدران ماحدش يسأل فيه؟......معقوله اسمع عن نجيب سرور
بالصدفه؟......معقوله ابراهيم عيسي ياخد ست اشهر و ممدوح اسماعيل بيتفسح في لندن....... هي البلد دي بتاعه مين بالظبط؟
اسمع عدلي فخري ........صوت كان بيغني لمصر بجد ...لكن مصر كالعاده ناسياه
4 comments:
عصفور النار
يبقي انت اكيد اكيد في مصر
شفت البيتين دول في مدونه عجبوني
هعبر بيهم عن اللي انت بتقوله لاني بجد مش لاقيه لا كلام ولافي اي تبرير غير ان الصوره بالمقلوب واحنا اللي مش عارفين نتقلب عشان نشوفها صح
صباح الخير يامصر الغريبه يامصر البعيده اللي مش شايفنها
صباخ علي يابلاد بنكرها وفي نفس ذات الوقت عايشنها
صباح الخير يابلاد بتكرهنا واحنا مخلوقين في نفس ذات الوقت منها
صباح الخير علي ارض قسيت علينا وطبطب حنانها علي اللي سارقينها
جمال حمدان اتقتل ما ماتش
شهيد يعني رحمه الله
تحياتي
البلد دي طول عمرها مش بلد أهلها
من أيام الاحتلال
ولما رجعت لولادها حاسين انهم اغراب فيها
امل دنقل وصلاح عبد الصبور وكل الناس اللي حكوا عنها ومنها وادفنوا فيها احياء بل ما يكونوا اموات اكيد سابوا بصمة حتي لو كانت مش واخدة حقها بس يكفي ان فيه حد زيك وزي ناس تانية لسة فاكرهم وبيقرالهم
جميلة اوي القطع اللي اخترتها
البلد دى بتاعة امه ياادهم
بالظبط كده
حالنا بقى مؤلم فعلاً
بس ربنا كبير.. يمهل ولا يهمل
وصدقنى لا يصح إلا الصحيح.. حتى لو بعد صبر طويل ومرير
Post a Comment