ولهذا اخدنا اجازه

مغلق للامتحانات

ونسألكم الدعاء

عمرو اديب يسخر من اضراب المصريين ويدعو الي مقاطعه الهولنديين

بداية عايز اقول اني لست من اشد المعجبين بعمرو اديب ورايي فيه انه اعلامي زكي يجيد قراءه البوصله الجماهيريه وينحو نحوها بمهاره شديده- لا ينافسه فيها الا مهاره اخوه في النفاق و الدفاع عن النظام وتبرئه مبارك من اي مصيبه من المصائب التي تحل بهذا الشعب يوما بعد يوم- بلا اي مباديء اصيله او افكار ثابته ....وهذا الاسلوب من عمرو يكمن تفهمه بحكم عمله في مجال الاعلام لكن لايمنع من الاختلاف معه ورفض تلك المباديء المطاطه

ظهر علينا الاخ بالامس وكان الموضوع هو اضراب يوم 6 ابريل وكانت الساحه مناسبه لسياده (المخبر) احمد موسي لكي يصول ويجول ويعدد مخاطر الاضراب واضراره علي البلد وعدم جدواه وطبيعي ان يظهر عمرو في تلك اللحظه بدور المدافع عن الحريات ويشغّل اسطوانه اللي عايز يضرب هو حروماحدش حايمسكه لكن وفي نفس الوقت لا يفوته ان يوجه رساله الي الناس بان المضربين همه قله قليله مندثه واوحي بانها فئه ضاله ليست ذات قيمه ولن تفت في عضد الشعب المصري اللي هو ولابيعمل اضراب ولا بيهتم بالحاجات دي وخليكو زي ماانتو يا اطفالي يا حلوين واوعو تضربو ولا بتاع واشربو اللبن قبل ما تنزلو الشغل روحو المدارس روحو الكليات افتحو محلاتكم اقعدو علي قهاويكم اشربوا شيشتكم بيعو واشترو وسيبو الجماعه المهاويس بتوع الاضاراب دول في حالهم (طيب ازاي انت بتدعي الحياد و ف نفس الوقت بتحرض الناس علي رفض الاضراب وعدم الاهتمام)...ثم كان الموضوع الاخر الذي تحمس له السيد عمرو بشده وهو مقاطعه هولندا بسبب الفلم المسيء للرسول.


وقضيه الرسوم المسيئه والفيلم المسيء تلك تعتبر من القضايا المجانيه التي لاتسبب مشاكل مع الامن او الدوله وجهازها الغول المهول الذي بلاشك تسطتيع اياديه الطويله ان تطول عمرو وغيره(واي متابع لتلك البرامج التي ظهرت في الفتره الاخيره علي الفضائيات المصريه و العربيه والتي مارست اشكال (غير مسبوقه )من الجرأه في تناول القضايا المختلفه يستطيع ان يلاحظ علو النبره في احيان وخفوتهاومطوحتها وتوهانها في احيان اخري لذلك فان العناوين المفضله في تلك الاوقات هي القضايا المجانيه تلك.... المحببه والمفضله لدي الدوله طبقا لنظريه "عصا موسي" و التي يمكنها ان تبتلع كل القضايا الاخري التي تسبب صداعا في راس الكبار وتململهم في جلستهم علي كراسي الحكم.

لست في حاجه هنا لان اقول اني ارفض الرسوم والافلام والمسرحيات او اي شيء يسيء الي الرسول عليه الصلاه والسلام فهذا ما لايحتاج الي ذكر حتي ....ولكن الا نسأل انفسنا ما هي الاسباب اصلا لهذه الاهانات ولماذا تتكرر تلك الممارسات وبرغم ماقام به السيد عمرو خالد والوفد المرافق له من زيارات مكوكيه الي الدانمارك وغيرها

اقول واجري علي الله ان البدايه ليست في الدنمارك والمشكله ليست في هولندا , المشكله هنا في اوطاننا العربيه والاسلاميه الحبيبه التي اصبحت قرينه للتخلف و الديكتاتوريه و التبعيه والخنوع والانبطاح وعروض الاستربتيز السياسي التي يمارسها حكامنا علي المحافل الدوليه بينما يمارسون الساديه علي محكوميهم في المحافل المحليه

مانعاني منه نحن الشعوب العربيه والاسلاميه هو مايمكن ان نطلق عليه "منخفض حضاري" اصبحت هويتنا و ثقافتنا ومقدساتنا بالطبع غير ذات قيمه و القيمه الوحيده في العالم هي للثقافه الغربيه وقد وصل اهل الغرب الي نتيجه عبر تاريخهم انهم وضعوا علامه (اكس) علي كل ماهو مقدس فكيف نطالبهم بان يحترموا مقدساتنا وثقافتنا اذا لم يكن لنا وجود اصلا ....اين العلماء في الدول الاسلاميه اين الصناعات في دولنا اي ما نصدره اين ماننجزه علي مستوي العالم اين نحن اساسا ....؟

يحضرني الان قول مريد البرغوثي حين قال

البيبسي , الكوكاكولا , هيلتون انترناشيونال
كنتاكي فرايد تشكن , جينرال موتورز
الزنازن و الهراوات
قال ابن خلدون :تلك هي مقومات الحضاره عند العرب


اقول انه ستستمر الرسوم تسيء الينا والي ديننا طالما استمر الظلم و ستستمر الافلام تسيء الينا و الي ديننا طالما استمر الفساد وستستمر المسرحيات المسيئه الينا والي ديننا طالما استمر الاحتكار و الاعتقال و التعذيب و الاهانه و التخلف و احتقار العلم و العلماء

كيف ننتظر احترام العالم اذا كنا لانحترم انفسنا؟

هي البلد دي بتاعه مين؟

"البلد دي مش بلدنا يا طه دي بلدهم هما"

بثينه السيد ....عماره يعقوبيان

من زمان باسأل نفسي سؤال ومش لاقي له اجابه ..وحتي لو لاقيتها بتبقي مؤلمه اكتر من السؤال نفسه ......هي البلد دي بتظلم ولادها قوي كده ليه ؟ ليه اللي بيحبها كارهاه و اللي بيكرها حبّاه؟ ليه اللي بيسرقها ويغرقها ويقتلها دايما فاكراه و اللي بيتغزل فيها و يبنيها ويعمر اراضيها دايما ناسياه ؟ ليه اللي بيغنيلها كانه بيغني بدمه دايما مجهول واللي بيتاجر بيها وفيها وباسمها ف كل حته هو اللي دايما شايلاه لفوق؟....ليه العمله الرديئه دايما هي اللي ع الوش و العمله الجيده دايما ممسوحه؟.....معقوله واحد زي الشيخ امام عيسي في اجيال كامله ماتسمعش عنه؟......معقوله مافيش ميدان في مصر باسم امل دنقل؟.....معقوله شعر صلاح عبد الصبور ما يتدرسش في المدارس؟......معقوله واحد زي جمال حمدان يعيش ويموت وحيد بين اربع جدران ماحدش يسأل فيه؟......معقوله اسمع عن نجيب سرور

بالصدفه؟......معقوله ابراهيم عيسي ياخد ست اشهر و ممدوح اسماعيل بيتفسح في لندن....... هي البلد دي بتاعه مين بالظبط؟

اسمع عدلي فخري ........صوت كان بيغني لمصر بجد ...لكن مصر كالعاده ناسياه

boomp3.com


boomp3.com



boomp3.com

تميم البرغوثي

لان القبيله اعتادت قديما ان تقيم الافراح احتفالا بميلاد شاعر جديد

بينما القبيله في هذه الايام تقيم المناحات

"حزنا وكمدا علي هروب "حارس مرمي

"فسوف اقيم انا هنا فرحا صغيرا احتفالا ب "تميم البرغوثي

في القدس

ثقافه الزمبأه

الان ....الان فقط اعلنها مدويه ...صارخه...زاعقه....ساحقه ....ماحقه اننا نعيش

ثقافه الزمبأه

بكل ما تحمله الكلمه من معني و ان شعار المرحله هو

" كَسْكِسْ ل اللي فوقيك وزمبأ في اللي تحتيك"

من واقع خبرتي التي لايستهان بها اطلاقا في الحياه العمليه استطيع ان اجزم انه لايوجد مكان علي ارض المحروسه لايرفع هذا الشعار ولا يتخذ منه سياسه واضحه , صريحه , معلومه بالضروره , ولكن غير معلنه بطبيعه الحال . فانت منذ يومك الاول في العمل لابد و ان تعلن ولاءك التام و تأييدك المطلق لرئيسك المباشر و انحيازك الصريح له في كل المواقف ومن غير المقبول اطلاقا ما يمكن ان نطلق عليه سياسه عدم الانحياز ( عدم انحياز ايه يا بني ما خلاص ده حتي كاسترو تنحي) و لهذا الانحياز الصريح كثير من التبعات المعروفه لدي الجميع اهمها انك تكون علي علم بأخبار زمايلك و مرؤوسيك في العمل وتنقلها اول بأول كذلك تكون علي استعداد تام و مباشر في اي وقت لالقاء وصلات المديح و القرع المتواصل كلما هلّ هلاله ونفحك بنفحه من كلماته الخالدات المخلدات في تاريخ البشريه التعيسه .....اما اذا لم تقدم اوراق اعتمادك تلك وتظهر مهاراتك في القرع وخلافه فانت قد دعت عليك امك في ليله القدر و اصبحت في عداد المنبوذين ..... و ابقي تعالي قابلني

-حتي بالنسبه لمجال الطب ف ....انت عشان تتعلم اي حاجه من استاذك او الاخصائي اللي معاك لازم تقدم فروض الطاعه و الولاء وتعلن صباح مساء انك من المؤيدين له و لسياسته تاييدا مطلقا .... يعني مثلا لو اهلاوي تسمي نفسك ابو تريكه و لو بيحب السادات تشتم في عبد الناصر و لو بيحب احمد عز تشتم في كمال الشاذلي

قال لي زميل في العمل انه تعلم من فتره خدمته في الجيش شيئين مهمين جدا الا وهما (امتي يزرّ و امتي يكَسْكِسْ) قالّي : انا كنت زمان زيك كده ماليش في الزرّ و الكَسْكَسَه , بس خلاص دلوقتي اتعودت , بقت حاجه طبيعيه , بقيت باستمتع بغباء الانسان اللي بنافقه وخصوصا لما يكون مصدق نفسه وعنده استعداد طبيعي لذلك

قال لي استشاري يعمل في مكان مهم جدا في مصر (يعتبر من القلاع الطبيه زي ما بيقولو) ان رئيسه القسم هناك عامله حواليها جهاز مخابرات ... العمال ينقلو اخبار الممرضين و الممرضين ينقلو اخبار النواب و النواب ينقلو اخبار الاخصائيين و الاخصائيين ينقلو اخبار الاستشاريين زمايلها..... قلتله : دي ولا ال كي جي بي في زمانها وافتكرت حكايه العيال اللي كانو بيبلغو عن اهاليهم ايام الاتحاد السوفيتي و( الله يخرب بيت جورباتشوف

اللي محيرني ان احيانا كل ده بيبقي في امور غير ذات قيمه ولمجرد فرض السيطره وخلاص , مش فاهم عشان ايه ده كله

هل هي طبيعه في الانسان .... حب المؤامرات يعني بما فيها من شويه مغامره؟

هل هو الفراغ السياسي؟ (جت عليّه فتره بافسر فيها اي سلوك غير طبيعي بانه نتيجه فراغ سياسي....كبت يعني)

هل هو جين في الخريطه الوراثيه بتاعه الشعب المصري اسمه جين النفاق؟ ...طيب اللي ماعندوش الجين ده يعمل ايه يهاجر كنكا!!!!!

كان في شخصيه لاحمد رجب اسمها (عباس العرسه) اللي هو الموظف الدائم النفاق لرئيسه واللي كان دايما وصله النفاق بتاعته بتبدأ ب "والله يافندم حلمت بيك امبارح .....الي اخر الوصله لما نوصل ل شلوط سعادتك دفعه للامام و شخبطه سعادتك تخطيط لمستقبل حياتي" انا بقي شفت ده بعيني بيحصل زي ما هوّ وفي اكتر كمان ..... اتضح انه مش كاريكاتير و مافيهوش خيال خاااالص

ما انكرش اني باستمتع برؤيه الشخص المنافق اثناء اداءه لوصله النفاق اياها وافضل اضحك اضحك لكنه ضحك ممزوج بالمراره

!!!!اللي حاغيظني انه احيانا النفاق بيبقي كده من غير سبب.... تقضيه وقت... ممارسه هوايه محببه عشان كده باقول انه اكيد له علاقه بالجينات.

يايُما ضلي اتبسمي

يا يُما ضلي اتبسمي.....الورده انسقت من مهجتك

كبرت وكبرت وزهرت وعطّرتها لمستك

تدبل يا يُما لو انها..... راحت بعيد وخلّتك

الله يا يُما يسعدك

الله يا يُما يسعدك

كل عام وكل ام في هذ العالم يخير وسعاده

......مملوكك لكني

شحبت روحي صارت شفقا
شعّت غيما و سنا
كالدرويش المتعلق في قدمي مولاه انا
اتوهج في بدني
اتمرغ في شجني
غيري اعمي مهما اصغي لن يبصرني

.........................

في حضرة من أهوى

عبثت بي الأشواق

حدقت بلا وجه

و رقصت بلا ساق

و زحمت براياتي

و طبولي الآفاق

عشقي يفنى عشقي

و فنائي استغراق

مملوكك......لكني

مملوكك.....لكني

سلطان العشاق

"محمد الفيتوري"

طبيعه صامته

زمان لما كانو بعلمونا ازاي ناخد التاريخ المرضي من العيان ونحب نسأله عن البيبي بتاعه شكله ايه قالولنا نقوله (الطبيعه عامله ايه) ....ها والطبيعه اخبارها ايه يا حج ؟.....يفهم الحج علي طول ايه المقصود بالطبيعه

غريبه قوي الحكايه دي..... الانسان المصري بيسمي البيبي طبيعه

"NATURE"

هل لان الحياه الطبيعيه بالنسباله بقت عامله زي البيبيي بالظبط , ام لان البيبي بقي هو الحاجه الوحيده اللي بتحصله طبيعي من غير لاواسطه ولارشوه ولا وجع قلب عموما مش هو ده موضوعنا , موضوعنا هو الصور الموضحه اعلاه (انظر الشكل بالاعلي ) الصور دي منظر "طبيعي "خلاب يخلب اللب و العقل من حديقه المستشفي اللي انا شغال فيها دلوقتي _من الزهق في النوبتشيه ام 8جنيه _قعدت اخدله كذا صوره بكادرات مختلفه بس للاسف الكاميرا بتاعتي تعبانه مش موضحه كم الطبيعه الموجوده في الخرابه (سوري )المستشفي لاحظ العلاقه بين الخرا به والبيبي والطبيعه ) كمان مش موضحه الاقبال الشديد من الدبان وشتي انواع العفن و الميكروبات و البكتيريا اللي بدات تتعايش معانا وكانها من القوه العامله بالمستشفي.... بس الحمد لله انها مش موضحه الريحه اللي طالعه منها والا كنا طفشنا المدونات اللي حوالينا

الغريب بقي ان المنظر ده واضح عيانا بيانا وقدام اللجان اللي رايحه جايه كل يوم والتاني تفتش و اللي اهم حاجه عندها تلاقي جثه الطبيب مرزوعه في مكانها في النوبتشيه ام 8جنيه ولابس البالطو الابيض ومكتوب عليه هو خط ايه بالظبط , لكن بالنسبه لوجبه التلوث والامراض اللي بتقدمها المستشفي لكل من تسول له نفسه بالقتراب منها , كل ده مش كهم خاااااالص.

مع تحيات وزاره الصحه المصريه

صحتك امانه بين ايديك

حافظ عليها احسن لك

محمود درويش

ّ

لا ارض فوق الارض تحملني فيحملني كلامي ,
طائرا متفرعا مني , ويبني عش رحلته
.....المبعثر

في
خيامي

من عشر سنين بالظبط ... كنت مره بادعبس عند بتاع الجرايد بادور علي كتاب جديد من بتوع القراءه للجميع لقيت كتاب اخضر صغير مركون علي جنب ما حدش معبره عليه صوره واحد بنضاره ومكتوب عليه (مختارت ) , ما قريتش اول صفحه زي م انا متعود مع أي كتاب جديد لا اخدته علي طول و خصوصا انه كان رخيص (قلت مش حايخسر حتي لو طلع وحش) , ودي كانت اول مره اتعرف علي اهم شاعر عربي في العصر الحديث (في نظري) , الا و هو (محمود درويش) , الكتاب ده لسه عندي لغايه دلوقتي بيقاوم عوامل التعريه و عمايل الزمن فيه مع اني من فرحتي بيه سلفته لطوب الارض , كنت عايز كل اللي حواليه يقروه و يعرفو ان في شاعر عبقري اسمه محمود درويش.

بعد كده بحوالي سنه كنت ف معرض الكتاب لقيت الاعمال الكامله بتاعته جبت المجلد الاول وكان بسعر غريب جدا لما الراجل قالي ما صدقتش قالي 35 حنيه لان الكتاب يعتبر طبعه فخمه وصادر عن دار العوده في بيروت يعني مستورد , كان ناشر سوري متهيالي انه قالي السعر غلط . المهم ان انا لغايه دلوقتي مش عارف اجيب المجلد التاني لاني كل مره الاقيه بسعر اعلي من المره اللي فاتت , اخر مره كان ب 180 جنيه (كتير مش كده)

وبعدين بدات اسمع عن واحد اسمه مارسيل خليفه بيغني قصايد محمود درويش , ودورت عليه لغايه ما جبت معظم الاغاني اللي غناها .

مره ابراهيم سعده كتب في العامود بتاع انور وجدي يقول (وكان وقتها درويش واخد جايزه افضل شاعر في القرن العشرين من سوريا –افتكر من اتحاد الكتاب السوري- علي ما اذكر ) .....المهم عبقري زمانه و اوانه الاخ ابراهيم سعده كتب يقول بالحرف .... من هذا الدرويش الذي يمنح افضل شاعر عربي و هل تناسو شوقي و حافظ و الرافعي و مش عارف مين تاني ) , ودي كانت اخر مره اقرا انور بيه وجدي وبدات اعرف ان كل ما الصحفي زاد جهلا كلما زاد منصبه في الجرايد اللي لامؤاخذه (قوميه).

وبدات اجمع المقالات اللي بتتكلم عنه وذلك لندرتها و كانت اخبار الادب هي المصدر المتاح وقتها

اخر مره جه فيها درويش معرض الكتاب كنت في البكالوريوس وكان عندي امتحانات ما قدرتش اروح , ومن ساعتها هو ما جاش تاني , اعتقد لان الجهابزه اللي ماسكين المعرض دلوقتي ما بعرفوش برضه مين هذا الدرويش , (نفسي احضرله امسيه في يوم من الايام).

:-و دي قصيده كتبتها ايام الكليه وكنت عاملها اهداءا لمحمود درويش

الي عاشق من فلسطين

( 1)

تري.... امازلت جدران السجن
تحفظ ما خطّ الولد العاشق
من رسائل حب الي معشوقته السليبه
ام ان الزمان اخذ الارض
ومعها كل اشكال الزاكره
( 2)
.......ايها الالم

كيف رايت ما في اعماقي الي هذا الحد؟
كيف مررت سريعا في دمي ؟
اتستريح الان في قلبي
نم .... فلا شك انت متعب من احراقي
( 3)
نرحل والورده يابسه
نعود والورده يابسه
ما رحيلنا وعودتنا
الا مرورا في شوارع غرناطه
وتفكيرا في ام من ترك الاندلس
ورحل شرقا ليمارس حرفته المفضله


( 4)
جوامع ام هياكل ام كنائس
اشكال زخرفيه ترفض الاتحاد في صوره
لكن الرب يبنيها جميعا
في وجه عابر يمر بارض فلسطين

( 5)
ايها العراف الذي يتنبأ بالاحداث
ايها الكاهن
الجالس علي انقاض المعبد
كفي..... ارجوك
لاتري اكثر من هذا
حتي .....لا تفقأ عينيك