that is what i call a good movie
في افلام كده بعد ما تشوفها تحس ان الحياه حلوه ..... حلوه بجد مش مجرد نظريات و لا محاوله للاقناع من اجل الاستمرار الفيلم ده من هذا النوع ......الغريبه اني قبل ما اشوفه كنت باتناقش مع واحد زميلي مهتم بموضوع التنميه البشريه و التفريق بين الناس علي اساس ان في ناجحين لهم خصائص معينه و اخرين فاشلين لهم خصائص اخري لكني ماكنتش مقتنع بكلامه ولا مصدقه لاني مش حاسه و انا اللي مش باحسه مش باصدقه و الحمد لله علي هذه النعمه.
والفيلم باختصار بيتكلم عن اسره مكونه من اب بيعمل في مجال التنميه البشريه و بيدي محاضرات بيشرح فيها كيف يتحول الانسان من واحد فاشل الي اخر ناجح -وكانه له الحق في ان يحكم علي الاخرين بالفشل- وذلك عن طريق برنامج ليس له نظير مكون من تسع خطوات ونلاحظ مع الاحداث تاثير الاب علي بقيه الاسره فالابن منغلق علي نفسه و يرفض الكلام حاطط في دماغه هدف واحد هو الالتحاق بالكليه الجويه و رافض الاسره وعايش منعزل عنهم و الابنه الصغري و هي محور الاحداث تحلم بان تصبح ملكه جمال الا انها لا تمتلك المقومات لذلك لكنها واقعه تحت تاثير النظريات المستمده من افكار الاب عن النجاح و الفشل بالضافه الي هؤلاء هناك نموذجان اخران هما الجد المفصول من العمل و الذي لجا في اواخر حياته الي الادمان و كذلك الخال الروائي الشاذ اللي حاول الانتحار و بالطبع هناك رفض من الاب لكل من الجد و الخال لانهما رمزان للفشل .
تقوم هذه المجموعه من الشخصيات برحله من اجل اشراك الابنه في مسابقه للجمال في مدينه اخري ومع تطور الاحداث نكتشف ان الابن مصاب بعمي الالوان وبذلك ينهار مع حلمه بالالتحاق بالكليه الجويه و كذلك نكتشف ان البنت لاتستطيع المنافسه في مسابقه الجمال كذلك الجد يلقي مصرعه تحت تاثير جرعه زائده من المخدر حتي الاب منظر التنميه البشريه نكتشف ان كتابه لا يجد دار نشر تطبعه و انه غير قادر علي تسويقه الا ان الاب وكذلك الابن يتوحد مه حلم الابنه و حقها في الشتراك في المسابقه حتي مع علمهم بانها لا فرصه لها في الفوز ويطرح الفيلم سؤال و يجيب عليه
السؤال هو من هو الانسان الناجح هل هو اقوي و احد ؟ ام اجمل و احد ام ازكي واحد ؟ ام ماذا ............ و يجيب الفيلم _من خلال الروح التي تسري بين الاسره من اجل المحاوله حتي لو لم يفوزو_ بان المحاوله و الاستمتاع بالحياه في حد ذاته نجاح و ان مش من حق حد يحكم علي التاني بالفشل طالما انه بيعمل الحاجه اللي بيحبها مش مهم النتيجه ايه...... و علي راي صلاح جاهين:-
انا اللي بالامر المحال اغتوي
شفت القمر نطيت لفوق ف الهوا
طلته ماطلتوش ايه انا يهمني و ليه
مادام بالنشوه قلبي ارتوي
وعجبي
